ময়দ হাতুমুডিরে দিনামগে ময়দ কয় কয়আসে নাতিন থাড়ি আতে দুবাঃ। হরা সেসেন হড়ক আঃএকে পইসাক হুরাঙাগিয়া। অকয়বা অডঃ চাউলি অমাগিয়াক, কাদলা অমাগিয়াক, উলি অমাগিয়াক, বিস্কুট অমাগিয়াক। আকয়াঃ অকা সানা, ইনাগে অমাগিয়াক অডঃ কানাঃ। বেড়া হাসুর মাড়াং আয়াঃ হাতুতে, অরাঃতে সেনাঃ।
অডঃ মুসিং এনকাগে কয় নাতিন কেচাঃ কম্বড় আটেদ কাতে আঃএ দুবাকানাঃ। ময়দ খেচড়া হন দ কানাঃ চেকা কেদাঃ, আয়াঃ থাড়িটা আরকিঃ কাতে নিরাদেন জানাঃ। হাড়াম কয় মেনকেদাঃ, "কুমডু, কুমডু, আঞাঃ থাড়ি আরকিঃ কেদাঃ, সাবিঃপে, সাবিঃপে। " মেনদ দুকু রেয়াঃ জাগার, এন সাময় জাপাঃরে যেতায় কাক তাইকেনা। ইনাতে যেতায়াঃ দেঁগা কাঃএ নামধাড়ি জানাঃ। থাড়িটামা কাঃএ নামকেদাঃ। চিমনাং পইসাক তাইকেনা, কাদলাক তাইকেনা, যেতানাঃগে কাঃএ নামরুওয়াড় কেদাঃ। রেঁগেঃহড়, কয়হড় বেডে আনাট রে উয়ুঃ জানাঃ। তায়মতে ইসুওয়াঃ হড় ইনা হরাতে হিঃ সেনজানাক। মেনদ আয়াঃ জাগার যেতায় কাক লুতুর কেদা। ময়দ কিয়াঃ চি, এন সেতাহঁ নির দাপুড় জানাঃ।
অডঃ কানাঃ, এন কয় ঞিয়াম জহকেদাঃ। ঞিয়াম ঞিয়ামতে গাধড়া তার জানাঃ। ইনা হাতুমুডিরে গরামথান তাইকেনা। গরামবঙ্গা আয়াঃ ঞিয়াম, আয়ঃ রধন আয়ম কাতে কয়াঃ জাপাঃরে অপেল জানাঃ, ময়দ সাদম কাতে। বঙ্গাকে লেল কাতে অডঃ জরতে ঞিয়াম কেদাঃ, আয়াঃ আনাটক মেন সদর কেদাঃ। গরামবঙ্গা মেতাকিয়াঃ, " হন, অডঃ আমকে ঞিয়াম কা হয়ুওয়া। মেদদাঃ বসঃগেম। হুডিঃ তাঁগিগেম। আমাঃ থাড়ি আউওয়া জামাঞ।" সঁগে সঁগে বঙ্গা নিমজাও জানাঃ। ডঁডেরেগে ময়দ সনা রেয়াঃ থাড়ি আউ কাতে কয়কে লেলচি কিয়াঃ। কুলিকিয়াঃ, " নিয়া চি আমাঃ থাড়ি ? " কয় উতরকেদাঃ, " কাগে গরামবঙ্গা, কাগে, নিয়া দ আঞাঃ কাগে তানা। আঞাঃ থাড়ি দ এলুমিনিয়াম রেয়াঃ। " অড হুডিঃ তাঁগিগিঞমে। নেংকা মেন কাতে বঙ্গা অডঃগে নিমজাও হাপিন জানাঃ। ডঁডে ঘোড়িরেগে ময়দ খাঁসাতে বাই থাড়ি সাব কাতে আয়াঃ জাপাঃরে থিঁগুন জানাঃ। থাড়িটা আঃএ সাই সাব কাতে মেতাঃইতানাঃ, " নে হাতাওগেম আমাঃ থাড়ি। " 
— গরামবঙ্গা, নিয়া টা দ কাঞ হাতাও ধাড়িয়া। 
— চিয়াঃ বালা ?
— নিয়া থাড়িটাহঁ আঞাঃ কাগে। 
— বুগিগে, বুগিগে। 
বঙ্গা এনাঃ নিমজাও আদেন জানাঃ। মঃঘোড়ি তায়মরে আঃএ উপান জানাঃ। তিরে সাবতাদাঃ এলুমিনিয়াম থাড়ি। এলুমিনিয়াম থাড়ি চেতানরে মেদ তারাশ উয়ুঃ তরসাগে কয় কাজি কেদাঃ, " হেই, হেইগা গরামবঙ্গা, নিয়াটাগে আঞাঃ থাড়ি। দাগা, আঞাঃ থাড়িটা। " গরামবঙ্গা এন কয়াঃ বেভারতে, জাগারতে ইসুওয়াঃ রাস্কাজানাঃ। ভাকাবি ঠরকেদাঃ, হাহাড়াবি ঠর কেদাঃ। হড় সনা লেল কেরেগে লবওয়াক, হাতাও নানামাক, " আঞাঃ আঞাঃ " মেনয়াক। মেনদ নাঃই কয়, আমাজিঃরেহঁঞ " কাঞাঃ কাঞাঃ " মেন কেদাঃ। সারতেগে, নিয়া রমজান দিশুমরে, নিয়া নপায়ানবসমতারে সারতেয়ান হড় দ মেনাঃ কোয়া, মানমী লেকান মানমী দ মেনাঃ কোয়া। কা বিলাম কাতে গরামবঙ্গা এন কয়কে আপিয়া গালেঃ থাড়ি অমাকিয়াঃ। রাস্কাতে কয় আঃএকে থাবের কাতে জোয়ারা কিয়াঃ। বিন্তিয়া কিয়াঃ, বাকাঁড়া কিয়াঃ। কয়কে সাবাস কাতে, সারাও কাতে গরাম বঙ্গা ইমতাং আয়াঃ থানতে হয়াংসেন জানাঃ। বিরিদ কাতে চিমতাং কয় কয়ঃকেদাঃ, বঙ্গাকে কাঃএ লেলনাম কিয়াঃ। ঠরকেদাঃ, আঃএ আয়াঃ ঠাঁওতে, ঠেয়াঃতে সেনতারা কানাঃ। মনে মনেতে অডঃগে গরামবঙ্গাকে বিন্তিয়া কিয়াঃ, জোয়ারা কিয়াঃ। সনা থাড়ি, খাঁসা থাড়ি অডঃ এলুমিনিয়াম থাড়ি, নে আপিয়া জকর থাড়ি আড়াঃ দিপিল ইদি কেদাঃ। 
আপিয়া থাড়ি লেল কাতেয়াঃ আয়াঃ বহু দমে রাস্কা জানাঃ। হাতুজাড়ি এনাঃ দ ইনাক লেল নাতিন ময়দময়দ তে হিঃহুঁডিন জানাক। আদম কদ ইনা লেল কাতে রাস্কা জানাক। " নিয়া মানমী সমাজরে নেস্কান, হড় মেনাঃ কোয়া ইসু লেকান " — ফারচা সাঁহিঃ ঠরনাম জানা। 
মদ হড় নুতুম তায়াঃ ফুর সিং মদ নিদা পন্থকেদাঃ, কানাঃ লেকাতে আঞহঁ এন আপি লেকান থাড়ি য়াঞ। উডুঃ উডুঃতে ময়দ হরা পিচানাম কেদাঃ। এনাঃ সেতাঃ জানা। বাসি মাডি জম কাতে ময়দ থাড়ি ইদি কাতে এন্ডে মেনেম হাতু মুডিরে দুব জানাঃ। থাড়িটা আঃএ লাঠা সাই হুরাং গিডি কাতে বাটি বাটিতে, থাবাঃ থাবাঃতে, গুড়দাম গুড়দামতে ঞিয়াম এটেঃ কেদাঃ। রধন রধনতে বাখাঁড় কেদাঃ, " ময়দ চেটলে হন আঞাঃ থাড়িটা আরকিঃ কেদাঃ। ইসুতান পইসা নাম লেদাঞ, ইনা কহঁ যত মাঠাও কেদাঃ। হায় হায়, নিমতাং আঞাঃ কানাঃ হবাওআ ! রেঁগে হড়, অকারে থাড়ি নাময়াঞ ? কানাঃ লেকাতে কয়য়াঞ ? সির্মাবঙ্গা, সির্মাবঙ্গা, আঞ সাই হুডিঃ হেতাহেম, আঞাঃ দুকু হারগেম। " আয়াঃ ঞিয়াম আয়ম কাতে গরামবঙ্গা সাদম রুপেতে আয়াঃ মাড়াংরে অপেল জানাঃ। কুলিকিয়াঃ, " তাঞ হন, চিয়াঃ ঞিয়াম জাদাম? মেনেম, আমাঃ আনাট কানাঃ ?" ফুর মেনকেদাঃ, " দিনাম লেকাগে তিসিংহঁ আঞ নেডে দুব দুবতে কয়তান তাই সাই ধাউড় জহকেদাঃ। ঠেক যমন, লকডউনরে পোলিশাঃ বরতে হরা সেসেন হড় কাইতর হাটিয়া ধারে দারু সুবারে দুদুব হড়, জিরাওয়েন হড় লাটাপাটা রাটপাট কাতে নির উকুন জানাঃ। আয়াঃ তানমান, হালাত লেল কাতে গরাম বঙ্গা ভাকাতার জানাঃ। এনাঃ দ অডঃগে এন ফুরকে কা বরচি কাতে উবাওরুওয়াএড়ন জানাঃ, জাপাঃ থানরে সেনঠাঁওয়েন জানাঃ। 
ইপিতু ঃ ১) " সারতে জাগাররে সিরপা  মেনাঃ,
        হিড়ি জাগাররে হিরকা মেনাঃ । " 
        ২) " সত্যি কথায় আছে পুরস্কার,
         মিথ্যা কথায় আছে তিরস্কার। "